සඞ්‌ගණිකාරාමතා
“ස්ථානොචිත ප්‍රඥාවෙන් යුක්තවූද, වසන්ට නිසිවූද, යහපත් හැසුරුම ඇති, පණ්ඩිතවූ, කල්‍යාණ මිත්‍රයකු ඉදින් ලද්දේ නම් සිහියෙන් යුක්තවූ පුද්ගලතෙමෙ ඔහු සමග සතුටු සිත් ඇතිව වාසය කරන්නේය.
තැනට නිසි නුවණැති, එකට හැසිරීමට සුදුසුවූ, මනා හැසුරුම් හා ධාරණ පුඥා ඇති, කල්‍යාණ මිත්‍රයකු ඉදින් නොලද්දේ නම් දිනාගත් රජය හැර, හුදකලාව වනයට වැද තපසට පැමිණි මහාජනක රජු මෙන්ද, හස්ති සමූහයා හැර මේ වනයෙහි හුදකලාව හැසිරෙන පාරිලෙය්‍යක නම් ඇතු මෙන්ද සමූහයෙන් වෙන්ව හුදකලාව වාසය කරන්නේය.
දෙලෝ වැඩ නොදත් අඥානයා කෙරෙහි එකට විසීමක් නැතිව, පිරිස් පාලනයෙහි උත්සා රහිතව උතුම් පාරිලෙය්‍යක ඇතු මෙන් හුදකලාව වසන්නේය. ස්වල්පමාත්‍ර වූද පව්කම් නොකරන්නේය. (උපක්ලේෂ සූත්‍රය/ කොටසක් පමණි)
ඒ අනුව ආශ්‍රය සඳහා සුදුසු ප්‍රඥා, ශ්‍රද්ධා රහිත මිතුරකු නොමැති වන අවස්ථාව දී තම පිරිස අතහැර වනයේ හුඳකලාව හැසිරෙන පාරිල්‍යෙ ඇතු මෙන් හුදකලා විය යුතු බව භාග්‍යවතුන් වහන්සේගේ අවවාදයයි.
එසේම භාග්‍යවතුන් වහන්සේ ධර්මාවබෝධය සඳහා භාවනා කරන බොහෝ පිරිසකට අවවාද කල සූත්‍ර දේශනා සලකා බැලීමේ දී නැවත නැවත ත්‍රිපිටකයේ සඳහන් වන දේශනාවක් වනුයේ “හුදකලා වූයේ සමූහයාගෙන් වෙන්න අප්‍රමාදව කෙලෙස් තවන විර්‍යයෙන් යුතුව කටයුතු”කලෝ උතුම් වූ නිවනින් නිවී සැනසුන බවයි. එබැවින් හුදකලා වීම සංගණිකාරාමයෙන් වෙන්වීම නිවන් මඟ නොපිරිහී ගමන් ගැන්මට හේතුවනු ඇත.
එසේම ආශ්‍රය කිරීමට සුදුසු මිතුරා කවුරුන් ද යන්න දැන ගැන්ම පිණිස පහත ලිපිය කියවා බලන්න.